Բացման հանդիսութիւն` Ս. Խաչ-Հարպոյեան բարձրագոյն վարժարանի 4-րդ նորաշէն յարկին

Շաբաթ, 7 փետրուար 2015-ին, երեկոյեան ժամը 7:00-ին, տեղի ունեցաւ Ս. Խաչ-Հարպոյեան բարձրագոյն վարժարանի 4-րդ նորակառոյց յարկի բացման հանդիսութիւնը` բարձր հովանաւորութեամբ Տանն Կիլիկիոյ Կաթողիկէ Հայոց Ներսէս-Պետրոս ԺԹ. կաթողիկոս պատրիարքին:
Բացման հանդիսութեան պաշտօնական արարողութենէն` ժապաւէնի հատումէն ետք, ներկաները յոտնկայս ունկնդրեցին Լիբանանի, Հայաստանի եւ Ս. Խաչ-Հարպոյեան վարժարանի քայլերգները, ապա Սոնիկ Բամպուքեանի մեկնաբանութեամբ «Ծիծեռնակ» երգին ընթացքին վարժարանին աշակերտները բեմական արտայայտութեամբ կառուցեցին Ծիծեռնակաբերդի յուշահամալիրի պատկերը:
Բացման խօսքով Գէորգ Յակոբճեան ըսաւ, թէ «հարիւր տարի առաջ ծիծեռնակը բոյն կը շինէր, սակայն թուրքը փորձեց ոչնչացնել զայն: Հարիւր տարի անց, ծիծեռնակը դարձեալ բոյն կը շինէ: Ծիծեռնակը այսօր այցելած է Ս. Խաչ-Հարպոյեան բարձրագոյն վարժարան ու հայու անպարտելի կամքին դրսեւորումով պաշտօնական բացումը կը յայտարարէ մարդակերտումի այս դարբնոցին 4-րդ նորակառոյց յարկին»: Ապա ցուցադրուեցաւ վարժարանին պատմական ու նորակերտ յարկին աշխատանքները ամփոփող տեսերիզ մը` Յովիկ Յակոբեանի պատրաստութեամբ:
Գեղարուեստական բաժինով, «Կիլիկիա» մաղթերգի նուագակցութիւնը կատարեցին երգեհոնի վրայ` Լիւսի Ղարիպեան, եւ ջութակ` Գէորգ Ներսէսեան: Անոր յաջորդեց ասմունք` «Վաղուան տունը», Մուշեղ Իշխանի համադրութեամբ, կատարողութեամբ Սարին Փօլատեանի: Յակոբ Փամպուքեան եւ Սերուժ Գուճանեան հրամցուցին երաժշտական կտոր մը կիթառի նուագակցութեամբ: «Բարի արագիլ» եւ «Հայաստան» երգերով ելոյթ ունեցան Կարօ Նագգաշեան, Սերժիօ Ահարոնեան եւ Սոնիկ Փամպուքեան:
Վարժարանի տնօրէնութեան խօսքը փոխանցեց տնօրէն Ռիթա Պոյաճեան, որ շեշտեց, թէ գիտակից ոչ մէկ հայ կրնայ ուրանալ հայ դպրոցին անզուգական դերն ու կարեւորութիւնը մեր ազգային կեանքին մէջ: Ան նշեց, որ ամէն գիտակից հայու պարտականութիւնն է հայ դպրոցը պահել իր յառաջապահ դերին մէջ, իսկ այդ յառաջապահութիւնը կը կարօտի տնտեսական եւ բարոյական անվերապահ զոհողութիւններու: Վարժարանի 4-րդ յարկի պաշտօնական բացման հանդիսութիւնը պատեհ առիթ նկատելով` Պոյաճեան մեծապէս երախտագիտութիւն յայտնեց Ներսէս-Պետրոս ԺԹ. կաթողիկոս պատրիարքին, որուն ջանքերուն շնորհիւ կարելի եղաւ իրագործել այս հսկայական ծրագիրը, ինչպէս նաեւ այս ծրագիրի յաջողութեան իր մեծածաւալ ներդրումը բերած բարերար Վարուժ Ներկիզեանին` համագործակցութեամբը Արաբական Միացեալ Էմիրութիւններու «Պանք օֆ Շարժա» եւ «Էմիրէյց Լեպանոն» դրամատուներուն:
4-րդ յարկի կառուցման ու արդի սարքաւորումներով կահաւորման աշխատանքներուն իր զօրակցութիւնն ու գնահատելի ներդրումը ունեցած Վարուժ Ներկիզեանի պարգեւատրումը կատարուեցաւ ձեռամբ հոգեւոր տիրոջ եւ տնօրէն Ռիթա Պոյաճեանի:
Ներկիզեան խօսք առնելով ըսաւ, թէ որեւէ եկեղեցւոյ կամ դպրոցի շինութիւնը, թէկուզ այդ ըլլայ ժամանակաւոր, ունի իր կարեւորութիւնը: Ան նշեց, որ բոլոր հայերը դարերէ ի վեր եղած են ուսումնատենչ եւ յաջողակ անձեր, այդ պատճառով հայերէն ձերբազատիլ ցանկացող անձեր թիրախ ընտրած են դպրոցներն ու եկեղեցիները` հայերը ոչնչացնելու եւ ջլատելու համար: Հետեւաբար, Ներկիզեան մեծ պատիւ զգալով իր զօրակցութիւնն ու օժանդակութիւնը մատուցած էր Ս. Խաչ-Հարպոյեան վարժարանի 4-րդ յարկի կառուցման աշխատանքներուն:
Ապա, խօսք առաւ Ներսէս-Պետրոս ԺԹ. կաթողիկոս պատրիարքը, որ ըսաւ, թէ այս տարի ձեռնարկեցին Ս. Խաչ-Հարպոյեան երկրորդական վարժարանին զարկ տալ, կառուցել եւ կահաւորել տալով վարժարանի շէնքին 4-րդ յարկը, նկատի առած ըլլալով անոր յարաճուն յաջողութիւնը եւ աշակերտութեան թիւին տարեկան աճը: Ան մաղթեց, որ վարժարանը շարունակէ գործել ի նպաստ հայ նորահաս սերունդներու լաւագոյն ուսումնառութեան` իրենց կրթական առաքելութեան զուգահեռ ապահովելով նաեւ նորահաս սերունդներուն դաստիարակութիւնը` քրիստոնէական, ազգային եւ մարդկային այն արժէքներով, որոնք զիրենք կ՛առաջնորդեն դէպի յուսատու եւ փայլուն ապագայ:
Հանդիսութիւնը աւարտին հասաւ Ներսէս-Պետրոս ԺԹ. կաթողիկոս պատրիարքի պահպանիչով եւ Տէրունական աղօթքով:



Ամենապատիւ Հոգեւոր Տիրոջ խօսքը Սուրբ Խաչ Հարպոյեան վարժարանին Դ. յարկի բացումին

Պէյրութ

«Արհիապատիւ Գերապայծառ Հայր Մանուէլ Եպս. Պաթագեան,
Մեծարգոյ պետական երեսփոխան՝ Մեթր Սերժ Թուրսարգիսեան,
Մեծարգոյ նախկին նախարարներ՝ Մեթր Ժագ Չուխատարեան եւ Մերթ Շահէ Պարսումեան
Գեր. Հայր Վարդան Վրդ. Գազանճեան, Տնօրէն Ս. Խաչ - Հարպոյեան Բարձրագոյն Վարժարանի,
Մեծայարգ Պրն. Վարուժ Ներկիզեան,
Մեծայարգ հիւպատոս San Salvador-ի հանրապետութեան՝ Մեթր Սարգիս
Սէրայտարեան,
Մեծայարգ զօրավարներ՝ Ժան Թալուզեան եւ Նազարէթ Գաբրիէլեան
Գերյարգելի, Գերապատիւ եւ Արժանապատիւ հոգեւոր հայրեր,
Առաքինազարդ քոյրեր,
Կրթական հաստատութիւններու Տնօրէններ,

Ազնուափայլ տիկ. Ռիթա Պօյաճեան, Մեծաւորուհի Ս. Խաչ Հարպոյեան Բարձրագոյն Վարժարանի,

Հաղորդակցութեան միջոցներու ներկայացուցիչներ,

حضرة الأب بطرس عازار، الأمين العام للمدارس الكاثوليكية في لبنان الجزيل الإحترام

حضرة السيد ميشال عساف المرّ، رئيس بلدية الزلقا الجزيل الإحترام

Յոյժ սիրելի եղբայրներ եւ քոյրեր,

Դպրոցը դաստիարակչական օճախ մըն է եւ ոչ միայն ուսումնառութեան եւ վկայական առնելու հաստատութիւն մը:

Դպրոցին պարտականութիւնն է նկարագիրը կերտել ամէն մանուկի եւ երիտասարդ-երիտասարդուհիի, որոնք իր դուռը կը զարնեն:

Նկարագրին կերտումը կը պահանջէ ժամանակ, համբերութիւն եւ մանաւանդ՝ այս պաշտօնին համար յատուկէն պատրաստուած դաստիարակներ: Նկատի ունենալու է, որ դաստիարակութեան գործը կոչում մըն է եւ ոչ միայն գիտութիւն, արհեստ կամ ապրուստի միջոց:

Դպրոցը կը շարունակէ աշակերտներուն մօտ ծնողներուն կողմէ աւանդած կրթական գործը, եւ երբեմն ալ կը փոխարինէ նաեւ զանոնք՝ նորահաս սերունդին պատասխանատուութեան ոգի ջամբելու, զայն ինքնաբաւ դարձնելու, եւ աւելին՝ յետագային կրօնական, քաղաքական եւ ազգային մարզէն ներս՝ անոնց գործօն դերակատարութիւն ունենալու իրենց ժամանակակից ընկերութեան մէջ:

Նկարագրի կազմաւորման կարեւորագոյն հիմերէն մին՝ հարազատ կերպով փոխանցումն է քրիստոնեայ սկզբունքներուն, որոնք կը սորվեցնեն դպրոցականին եղբայրսիրութեան եւ անձնուիրումի ոգին, որ կը նշանակէ՝ ունենալ գիտակցութիւնը եռանդով եւ զոհողութեան հոգիով ծառայութիւն մատուցանելու: Ուստի, ծուլութիւնը, նախանձը եւ անձնասիրութիւնը տեղ չունին լաւ դաստիարակուած եւ քրիստոնէական կրթութիւն ստացած երիտասարդ-երիտասարդուհիի միտքին ու սրտին մէջ:

Նկատի առած մեր հայկական ազգային դրոշմը, անհրաժեշտ է նաեւ լրացնել նորահաս սերունդին կազմաւորումը, անոր դասաւանդելով հայոց պատմութեան իրերայաջորդ հանգրուանները՝ իրենց դժուարութիւններով ու յաղթանակներով, ինչպէս նաեւ ծագումը հայկական մշակոյթին՝ շնորհիւ ռահվիրայ դաստիարակներուն՝ Հայրապետներուն, վանականներուն եւ կուաններուն մտաւորականներուն եւ հայկական մամուլին:

Սերունդներու դաստիարակութիւնը ազգային հրամայական մըն է, որ պէտք է կատարել խիզախ սրտով եւ աչալրջութեամբ՝ յաղթահարելու համար ժամանակի մարտահրաւէրները, մանաւանդ՝ այլասերման ծաւալուն վտանգը: Այսպիսի մարտահրաւէրին ակնարկելով, Բենեդիկտոս ԺԶ. Սրբազան Պապը կ'ըսէր «Այսօր, դաստիարակութեան գործը միշտ աւելի բարդ ու դժուար կը դառնայ: Խնդրոյ առարկայ են յատկապէս տարածուած միջավայրը, մտայնութիւնը եւ մշակոյթի նոր ձեւերը, որոնք մարդկային արժէքին եւ ճշմարտութեան մասին կասկած կը յարուցանեն». վերջ մէջբերումին:

Վերոյիշեալ պատճառները մեզ մղեցին մեր վարժարանները՝ յառաջիկայ տասնամեակ մեր գործունէութեան առաջնահերթութիւններէն մին դարձնել: Ասոր համար, այս տարի ձեռնարկեցինք Սուրբ Խաչ Հարպոյեան Բարձրագոյն Վարժարանին զարկ տալ, կառուցանել եւ կահաւորել տալով վարժարանի շէնքին չորրորդ յարկը եւ տանիքը, նկատի առած սոյն վարժարանին յարաճուն յաջողութիւնները եւ աշակերտութեան թիւին տարեկան աճը:

Մեր այս առաջադրանքին արդիւնքն է այսօր՝ բացումը՝

- Դպրոցական նորակռոյց նոր յարկին,

- Արուեստից բաժնի Պէթէ Գ. դասարանին,

- Ուսումնական յատուկ կարիքներու կարօտ աշակերտներու բաժանմունքին,

- եւ վերջապէս՝ Ամերիկեան Ծրագրի նոր բաժանմունքին։

Իր այս ուսումնական չորս ճիւղերովը, չըսելու համար՝ չորս դպոցներովը, Սուրբ Խաչ Հարպոյեան Բարձրագոյն վարժարանը կու գայ ամբողջացնելու ու բաւարարելու աշակերտութեան ուսումնական-կրթական ժամանակակից այլազան պահանջները, եւ դառնալու լիբանանահայ յառաջապահ կրթօճախ մը։

Մեր մաղթանքն է, որ մեր հայ կաթողիկէ վարժարանները, եւ ի մասնաւորի՝ Սուրբ Խաչ Հարպոյեան Բարձրագոյն Վարժարանը, իրենց կրթական առաքելութեան յարաճուն զարգացման զուգահեռ՝ յարաճո՛ւն կարեւորութեամբ շարունակեն նաեւ նորահաս սերունդներուն դաստիարակութիւնը՝ քրիստոնէական, ազգային եւ մարդկային այն արժէքներով, որոնք զիրենք պիտի առաջնորդեն դէպի յուսատու եւ փայլուն ապագայ մը:

Մեր այս մաղթանքին իրագործումը բնականաբար կը կարօտի նաե՛ւ ծնողաց գիտակից ու անվերապահ գործակցութեան: Մեր ակնկալութիւնն է, որ ծնողքը այսպիսի մօտեցում ցուցաբերեն հանդէպ կրթական այս օճախին, որ իրաւամբ կը նկատուի իրենց զաւակներուն երկրորդ ընտանիքը:

Վերոյիշեալ ձեռնարկները եւ յարաճուն յաջողութիւնները տեղի պիտի չունենային առանց Սուրբ Խաչ-Հարպոյեան վարժարանին անխոնջ, անձնուրաց եւ ամբողջական նուիրումին ու անընկճելի կամքին ազնուափայլ Տիկին Ռիթա Պոյաճեանին:

Եւ վերջապէս, մենք երախտագիտութեամբ եւ օրհնութեամբ կ'ուզենք յիշատակել այն բարերարները, որոնք իրենց նպաստն ու աջակցութիւնը չեն զլանար ի խնդիր մեր կրթական ծրագիրներու յաջողութեամբ պսակումին: Յատուկ կերպով կ'ուզենք երախտագիտութեամբ յիշել Տիար Վարուժ Ներկիզեանը, որ մեծապէս օժանդակեց Ս. Խաչ Հարպոյեան Վարժարանի Դ. յարկին կառուցման գործին: Շնորհակալութիւն Ձեզի մեծայարգ Տիար Վարուժ Ներկիզեան:

Դէպի նորանոր նուաճումներ եւ յաջողութիւններ Աստուծոյ օրհնութեամբ»:


+ Ներսէս Պետրոս ԺԹ. Կաթողիկոս Պատրիարք Տանն Կիլիկիոյ Կաթողիկէ Հայոց